政情：賀聖誕展歌喉 何永賢唔怕獻醜

何永賢喺台上自爆話，平時好少人會邀請佢去唱歌，所以當佢收到機構邀請，心情好興奮，即刻同同事講「去啊」！況且唱聖誕歌不但好開心，仲要同啲小朋友一齊合唱，特別窩心咁話喎。

儘管何永賢話唔會客氣，自己願意「獻醜」，而且會大大聲咁唱喎。不過喺音樂響起後，佢都有少少猶豫咁，好似喺度問側邊嘅人點唱，但佢又確實唱咗幾首聖誕歌嘅，好似Santa Claus is Coming to Town同Jingle Bell咁。而當佢放低支咪之前，話接任房屋局局長之後，未試過「又唱又跳，又嗌又笑」，雖然過程中冇乜聽到佢嘅歌聲，但都總算有開金口，至於唱得好唔好聽，咁就見仁見智啦。