政情：拍片分飾3角 梁子穎變肥版湯川學

尋日係冬至，係團圓嘅日子，但有勞工界議員竟然「開戰」喎。唔係呀！咁掃興？話說同屬一個工會嘅兩個議員拍咗段片，講明係「工家大戰」，既然係一家人點解要開戰？講就勁，實際只係問答題，仲係冇獎遊戲。陸頌雄繼「醬爆」之後，再「百萬富翁」主持人上身咁，而另一議員梁子穎就一人分飾3角，一時扮日劇《神探伽利略》中嘅「湯川學教授」，似唔似福山雅治？充其量係肥版。跟住又扮帶住黑超嘅「超哥」，仲有攞住士的嘅「的哥」，可謂過足戲癮。