政情：改善交通安全 陳恒鑌倡貪新鮮

「趣怪的斑馬線」竅妙之處唔喺路面，而係在於俗稱「黃波燈」嘅黃色指路燈，多咗一層閃爍LED燈嘅外框同埋頂端嘅攝影機。阿Ben話上址鄰近小學，一去到放學就好多人，過去因發生交通意外，於是同運輸署商討，要求加設紅綠燈或作出改善措施，結果當局認為斑馬線較有效益，於是就有呢個設置，依家仲係試驗階段。

阿Ben話嚟緊立法會將有一個關於電子執法嘅法例會通過，所有駛經嘅車輛遇到有行人打算過斑馬線的話，必須停車，否則會被攝影機記錄，日後有遭到檢控嘅可能。

喺現場觀察咗一段時間，佢話好多車喺「趣怪的斑馬線」前都相當自律，仲見過有司機停車詢問途人係唔係過馬路添！雖則話後續效果如何需要再觀察，但佢認為改善交通安全嘅措施，政府唔好咁保守，諗住陳陳舊舊用得就用，反而要多啲嘗試新方法先得㗎！