政情：上議會新丁班 尚海龍自評幼園生

佢哋去到立法會會議廳後，由秘書處教吓點樣撳掣投票，佢哋坐喺自己個座位度，仲獲得一對一指導添，所以好快就識撳贊成同棄權。期間立法會秘書長陳維安同立法會主席梁君彥都有出席。參觀完會議廳後，被問及尋日有咩特別，何敬康就笑住話都係學習，而尚海龍就話仲學緊議事規則，要繼續返去上堂喇。

之後，何、尚兩人首次去到咪兜，尚海龍話經過半日學習同實踐後，都仲係「幼稚園」資歷，希望可以趁聖誕假期多多溫習，明年有意參加工商同埋政制事務委員會，而因應陳紹雄邀請，尚海龍已經加入「C15+」喇。至於何敬康，話要返去要熟讀議事規則，呢段時間會休息一下，希望下個立法年度有充足精神面對工作，希望大家錫住佢咁話。