政情：梅窩長命斜 村民叫苦連天 10幾年零改善

葉劉喺社交平台貼文，話梅窩窩田村居民代表鄧家洪村長多次向佢投訴，銀礦洞旁嘅大斜路一直困擾村民，事關呢條「長命斜」係村民每日往返嘅必經之路，但對於不良於行嘅長者或細路，就行得好吃力，叫苦連天。

見佢仲上載咗幾張相，小朋友坐喺特製嘅手推車落斜，前面仲有一個大人倒轉行以控制速度。另一張相就係工人用手推車送罐裝石油氣，雖然拍攝之時係落斜，但可以想像要推上斜幾咁吃力，佢都話完全體會村民嘅苦況。

「長命斜」唔係今日先至存在，佢話村民喺過去10多年不斷要求政府修建改善，但一直都冇回應，而政府最後一次書面回覆已經係5年前，土木工程拓展署喺2017年4月回覆嘅信件，話條大斜路「因地勢險要，修建道路工程存在困難，並非想像中容易，會就修建路段作出進一步研究，期盼能找出可行方案，並承諾會與村民商討」。佢批評該署回覆明顯係搵藉口推搪、敷衍了事，至今署方亦冇再作回覆，當然亦冇採取任何積極方法改善。

話時話，香港人口老化嚴重，葉劉指政府經常將「民生無小事」掛喺嘴邊，追問政府相關部門，究竟改善梅窩呢條大斜路嘅工程有幾困難？係咪要花費巨額公帑？當中究竟有乜嘢不可克服嘅難處？抑或係條村人口稀少，兼且以老弱村民居多，政府就漠視訴求，完全置諸不理，敷衍了事？

追咗政府10幾年，「長命斜」都未處理，唔知仲要等到何年何月，所以行動最實際，佢講明答應咗村長會喺立法會事務委員會跟進。到時相關部門想避都冇得避呀！本報尋日亦向土木工程拓展署查詢有關事宜，暫未獲回覆。