政情：立會新位出爐 陳永光與黨友為鄰

答案係唔會㗎！嚟緊佢哋係會坐番之前辭任嗰4位議員嘅舊座位。立法會秘書處發出嘅最新座位表，喺立法會開大會嘅會議廳，同樣都係創科界出身嘅黃錦輝會坐番喺孫東以前嘅位，同選委會界別議員劉智鵬同李鎮強做「鄰居」；尚海龍就會坐番麥美娟個位，坐喺工聯會黃國嘅隔籬；雖則何敬康係新民黨成員，由於該黨附近無座位空缺，佢都唔能夠坐番喺黨友隔籬，嚟緊佢就會坐喺林智遠以前嘅位，即係主席望向議員角度，右邊最後嗰排，夾喺林順潮同陳月明嘅中間。至於陳永光就埋番民建聯堆，同黨友林琳做「鄰居」。

至於會議室1方面，尚海龍同埋陳永光會分別繼續坐喺工聯會同民建聯嘅議員隔籬，而何敬康同黃錦輝就坐喺選委會嘅同事附近， 而何就坐喺佢班黨友嘅前一排。

另外，由於係以名單制加入各委員會，所以議員都要埋堆先有機會入，而無黨派嘅兩名新丁黃錦輝同尚海龍就入咗陳紹雄名單，呢張名單由14人增至16人。