政情：輸世盃牙骹戰削髮 許立燊假剃頭蠱惑

話說喺世界盃決賽開波之前，沙田區議員許立燊喺網上開Live，話突然受到沙田區議會主席麥潤培挑機。乜嘢挑機？原來之前佢哋喺開賽之初已經傾過，麥話許係撐阿根廷嘅，仲話若果阿根廷贏波，佢就剃頭。

雖然許同麥係好兄弟，但麥鍾意同許唱反調，麥喺Live入面強調許撐邊隊，自己就會撐另一隊。講講吓，連大埔區議員何偉霖都加入埋，話希望睇許嘅新造型，直情話「想睇你剃頭」。當時許都掹開件外套，着喺裏面嗰件係阿根廷波衫。跟住幾個人就講吓對阿根廷隊有乜睇法。麥話睇過1998年世界盃，唔多識依家啲球員，而許話佢外婆一家都鍾意阿根廷，嗰時無咁厲害嘅射手。

散咗Band之後，許再喺半夜開Live，佢話嗰時阿根廷領先2：0，仲自言心情有啲激動添！阿根廷贏緊，即係佢剃頭機會愈嚟愈高，而佢亦開始抓抓兩邊嘅頭髮：「大家可以懷念我呢把長髮。」跟住又轉口風，話當然唔可以鬆懈，記得8強戰，阿根廷對荷蘭喺82分鐘追平，所以可以追番嘅，然後又話：「唔會走數。那一束長髮！」又話咁夜，聯絡緊邊度剪。可見佢嘅心情七上八落。到咗兩隊射12碼，佢就更加緊張，最終阿根廷捧走世界盃。

事實擺在眼前，之後好多人喺佢Facebook（Fb）留言「追數」，麥潤培更留言話許唔找數，就喺尋日下晝由許做主席嘅區議會轄下委員會開會時，逼佢即場剃頭，有網友仲要求開Live直播添！

可能畀人追得緊，許喺朝早已經去咗剃頭，仲喺Fb貼咗張剃頭相，剃咗中間嗰啲頭髮呀！非常怪相。但有網友話佢後生咗20年。見到呢幅相，有啲網友唔收貨，話唔係佢哋想要嗰款喎。

麥潤培直情喺下晝入咗沙田區議會會議室，仲拍攝到許嘅新Look，發現許冇剃光頭，只係剪短咗頭髮，大鬧佢呃人，根本係假剃頭、真剪髮，仲話反對揸流攤，話強烈要求許全力剃光頭。唔知許會唔真「找數」呢？