政情：蘇長榮斥政府唔放水 難為關愛隊

喺地區搞唔少活動嘅「3大社團」都諗住申辦關愛隊，其中香港島各界聯會喺10月中舉行咗新一屆理事會選舉，為配合未來發展，亦重組咗5個委員會。因應關愛隊嘅設立，聯會特別設有社會關愛事務委員會，策劃及統籌社會行動或關愛活動、關注民生問題及推動地區工作等。身兼理事長嘅蘇長榮話，對喺推動地區服務時所需嘅人力物力並唔擔心，但希望政府畀足夠資源同埋設立恒常機制，讓地區團體可以運行得更為順暢。

佢批評政府畀公共服務資源與地區服務行動一直嚴重脫節，地區團體可以話係冇得到任何資源，導致大部分地區工作嘅開支需要自行籌款，但長遠嚟講呢個並唔係好嘅發展，佢認為政府要提供足夠資源。至於每區幾多錢，佢又認為不能一概而論，主要係政府要凝聚地區，甚至設立恒常機制，雙方保持聯繫，而唔會演變成有事鍾無艷、無事夏迎春。