政情：黃錦輝唔夠淡定宣誓咬字不清

據實聲明變「確」實話會盡「遵」職守

立法會補選前日結束，4名當選人包括陳永光、黃錦輝、何敬康同尚海龍，尋日朝早10點就喺立法會會議廳進行宣誓儀式，由行政長官李家超監誓。原本大家都預料，今次會無驚無險咁完成宣誓，點知喺宣誓差唔多完成嘅時候，立法會秘書長陳維安突然出聲喎，究竟佢講咩呢？

首先宣誓嘅係何敬康，依次係尚海龍、陳永光，最後係黃錦輝。當黃錦輝讀完誓詞後，陳維安就出聲，話黃錦輝讀誓詞唔清楚，要求佢重讀，而黃喺讀第二次誓詞後亦成功獲陳維安接納。究竟佢衰咩呢？原來係因為佢咬字不清，將誓詞第一句「據實聲明」讀錯咗做「確實聲明」、「盡忠職守」讀音偏差，變了盡「遵」。佢事後解釋，話係因為緊張，而自己之前已經排練過4、5次嘞！

議員排隊搵陳永光把脈

雖則依家立法會已休會，但仍然有唔少議員返嚟觀禮、捧新丁場，有部分議員仲專登返嚟「睇病」添！「睇病」？話說喺宣誓之前，班當選人入咗前廳等候，而立法會主席梁君彥同議員葛珮帆、林琳、何俊賢，同埋另一當選人尚海龍都遞隻手出嚟，搞乜嘢？咪就係等中醫師陳永光幫佢哋把脈囉！在座嘅議員仲笑言，希望陳醫師可以喺立法會嘅辦公室為各位議員義診。話時話，陳醫師冇講梁君彥身體狀況點，但見到冇戴口罩嘅梁笑容咁燦爛，就知應該乜事都冇。

前日唔止補選完咗，世界盃亦正式落幕，阿根廷同法國合力上演咗一場好精彩嘅比賽，相信唔少人都會被雙方球員嗰種拚勁，同埋球員間嘅團隊精神感染到，連梁君彥都唔例外。佢話喺4個議員宣誓後，90個議席正式「齊腳」，佢寄語一班議員話希望未來可以見到佢哋喺議會發揮好團隊精神，一齊為市民、為香港「踢場好波」咁話喎。