昔日東方政情：天星小輪亟待急救 政府勿再翹埋手
唔開放旅遊 「流血」未見盡頭
疫下百業蕭條，業務即使有專營權亦要慘淡經營，譬如天星小輪就聲稱每星期虧損100萬元，早前向政府提交加價申請。同好多巿民一樣，議員江玉歡反對加價，但佢就理解到天星小輪之所以業績見紅，責任在於政府唔開放旅遊，經濟冇復原，而呢筆導致虧損嘅帳唔應該轉嫁畀市民，反而係由政府承擔先至啱！
童年時經常搭天星小輪返學嘅江玉歡，回想昔日坐巴士到尖沙咀碼頭然後搭船過海，朝早人頭湧湧嘅情景，佢話相信唔少人都經歷過，認為小輪確實為港人帶來不少回憶。然而論收入，天星小輪喺遊客方面嘅進帳相當可觀，所以遊客冇來，自然就會嚴重虧蝕。
江玉歡鬧爆冇復常路線圖
天星小輪早前表示，過去3年錄得數千萬元虧損之餘、仲要每星期蝕100萬元咁「流血」！所以申請兩條專營航線加價一倍，又有意取消現行嘅長者免費搭船優惠。
天星小輪咁嚴峻嘅財政局面，最弊係唔知幾時先至見到盡頭。江玉歡批評政府對於復常一直都冇時間表、冇路線圖，防疫措施同成效都冇數據同圖表，覺得政府係完全冇部署。佢又話上個月嘅國際七人欖球賽都可以睇到，香港嘅防疫政策喺主動同被動間不斷游移。江玉歡認為香港唔係冇復常嘅實力，只係政府唔肯做，既然天星小輪因政府嘅防疫抗疫措施而出現虧蝕，所以呢筆帳亦應該係由政府處理，而唔係交畀市民埋單囉！
江玉歡又提出一個政府要支援天星小輪嘅理由，就係作為公共交通之外，天星小輪亦屬於香港嘅地標，若果可以經營落去，勝過搞多少個旅遊辦事處啦，咁由政府幫吓手都係理所當然！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
