政情：洪雯鬧爆 房策藥石亂投 公屋基層難上流

洪雯日前出席網台節目，指房屋局日前就簡約公屋而向立法會申請撥款，好多議員都質疑3萬個簡約公屋竟需財320億元造價未免太高，即使扣除部分可以再用嘅設施，都要89萬元一個單位，然而使用期只得5年，而呢筆錢仲未計5年後拆卸嘅費用。再者，政府物色簡約公屋嘅地點，往往係一啲原本闢作公屋配套設施嘅用地，如社區會堂、學校、運動場之類。當簡約公屋佔用配套設施用地，住得幾年之後拆卸以恢復原來計劃嘅社區設施，即是話公屋應享嘅配套設施要延後5至10年，期間仲要多咗人住，令到本來就不足嘅設施更形緊絀。與其係咁，何不直接興建公屋呢？

對於政府不惜代價咁四出搵地起公屋，洪雯話係「斷錯症」，指香港根本不缺公屋，缺的只係公屋居民向上流動嘅房屋階梯。佢話每年都有數萬公屋居民申請購置居屋，然而中籤者非常少，如果佢哋都如願以償成為居屋業主，咁就可以騰出好多公屋單位畀基層，好過起簡約公屋啦。然而，近年嘅居屋供應量遠遠不足以應付每年廿幾萬嘅申請；私樓市場因應年輕人有限嘅購買力而推出「納米樓」，其樓價升幅更高過其他物業。高不可攀嘅上車門檻會令人寧願維持低收入，做基層排隊輪公屋，結果市民對公屋需求不斷膨脹，超過公屋嘅落成量。結果過去十幾年公屋總量不斷增長嘅同時，人口卻呈萎縮，但依然唔夠住。

洪雯認為房屋問題唔可以只看供應，還要想辦法管理需求，畢竟公屋既是福利，亦係一個令人不願向上流嘅陷阱。佢主張房屋同就業結構皆以中產為主，應集中資源起中產屋，而非公屋。而居屋質量同公屋不可太接近，應該要拉開距離，先至可以吸引人向上流動，當然亦要扶助基層，幫年輕人搵到立足之地，而唔係好似依家咁，停止上流以遷就公屋資格。洪雯又指，新加坡嘅房屋政策本來係向香港學習，不過人家唔係着重基層嘅公屋，反而係走中產路線，結果日後相較於香港，新加坡嘅「組屋」令港人稱羨。

就此，洪雯日前去信當局提出多個疑慮，包括現時過渡性房屋入住率偏低，點樣確保簡約公屋嘅入住情況，以及有無評估拆卸成本同對環境造成嘅影響。同時提出3點建議，包括放棄一筆過撥款，先將目前已公布選址的4個簡約公屋項目轉為「先導計劃」，等項目建成後，根據使用情況作出檢討。又建議整體統籌合共5萬個簡約公屋及過渡性房屋單位嘅建設，甚至局方可以委託團體，針對潛在用家即輪候公屋嘅人士進行取樣調查，了解佢哋遷入簡約公屋嘅意欲及其他需求。