政情：中大修例 議員轟校董會「管管相衞」

議員梁美芬形容中大校董會「管管相衞」，指身兼校董嘅校內管理層太多，甚至有教職員「敢怒不敢言」，懼怕一出聲就會遭到「cut funding」（裁減經費），佢敦促中大校董會主席查逸超勿做橡皮圖章，被人蒙在鼓裏，須監督校長權力。至於改革嘅內容，係建議更改中大校董會嘅校外、內成員比例至2比1，同埋提高校長聘任嘅門檻，須不少於校董會四分之三嘅成員通過。儘管議員狄志遠擔心，校董會嘅校外成員多過校內成員，恐招外界人士駕馭學校管治之嫌，況且要有四分之三成員通過方可聘任校長，憂選舉有機會流產，但查逸超回應指，期望明年2月底之前，校董會可以召開特別會議處理相關議題。

另外，尋日會議亦討論修訂《嶺南大學條例》的擬議議員法案。有關嶺大嘅改革，主要係副校長由一位增加到3位，校董會當中原以學生會主席作為一位學生代表，就改為由本科生、研究生各一嘅學生代表。狄志遠指學生會主席冇得做代表，會令大學「去學生會化」，嶺大校長鄭國漢就話該校嘅學生會不足以代表全體學生，故打算取消學生會主席作為當然代表。