政情：酒店變青年宿舍陳紹雄憂通關後唔續

為盡早解決青年人嘅居住問題，政府喺《施政報告》宣布會研究不同方式增加青年宿舍供應，目標係5年內提供額外約3,000個宿位，而有關措施就係透過支援非政府組織，於酒店同旅館推行青年宿舍項目。但隨住內地防疫政策有放寬，通關似露曙光，有議員質疑青年宿舍計劃可能會遭到酒店業冷淡回應，促政府提供應對方案。民政及青年事務局副局長梁宏正就話，雖大家對通關熱烈期盼，但相信有興趣參與計劃嘅酒店未來會繼續發展。

民青局話資助額足夠

雖則政府已訂下明年首季有青年宿舍可以入住嘅目標，然而立法會財務委員會尋日通過涉款10億元嘅承擔額，用以支援非政府機構於酒店同旅館推行青年宿舍項目。但議員陳紹雄指出內地放寬防疫要求，恢復通關可期，質疑酒店業界參與計劃嘅意欲。議員邵家輝就話，依家冇旅客梗係全部話支持，但通關後撥出3,000多間房作青年宿舍，屆時香港酒店房價上漲實在難以避免喎。

梁宏正話相信金錢、社會責任都係業界嘅考慮因素，有關計劃係商民攜手參與青年發展工作嘅機會，認為現階段資助額足夠，若有需要申請更多金額會到財委會再次申請。佢又話合資格房間全港有80,000多，政府有信心如期達到目標嘅。