政情：主席為立會作年 結強調監察精神不滅

就今屆議會嘅組成，有聲音指係「清一色」，問及驚濤駭浪是否不再出現，梁君彥回應話議會有火花擦出，但五光十色不會變成白色、黑色，舉例指不是每個議員議案都一致性，反而有不通過，正正是將不同聲音帶給政府。佢話傳媒若仔細報道，就知道議員並非如坊間所稱嘅「橡皮圖章」。其實議員有做到監察，只係唔用拉布、製造流會或阻礙開會等方式，而係良政善治、互動嘅監察，佢強調多個事務委員會中，議員對政府都提出好尖銳嘅問題，如職安健嘅討論，官員往往語塞，導致法案委員會進度緩慢，另外官員好怕「開位」，事關要面對議員詳細質問。佢話做議員唔係為咗個人宣傳，但提出修訂等做實事嘅行徑，就屬於「唔係好juicy（有趣）嘅嘢」，傳媒鮮有報道，反而佢早前「擺烏龍」，將議員簡慧敏讀錯為周慧敏就會見報。

談及議會嘅成績，梁君彥指本立法年度共舉行33次立法會會議、通過17條政府法案，會議合共用時264小時22分，期間通過多項重要法律，包括取消強積金對沖、落實香港設立國際調解院籌備工作室，以及《2022年版權修訂條例》等。另外，今個會期完成審議176項「先訂立、後審議」嘅法例，並進行咗33項無立法效力嘅議員議案辯論。

至於因應本屆政府嘅主張，立法會至今舉行咗5次嘅前廳交流會，梁君彥認為效果良好，有必要維持前廳交流會嘅安排，雖然不同嘅議員、官員有不同嘅期望，但認為無一種方式適合所有人，承諾往後會再調節。