昔日東方政情：逾三分之一議員中招 陳勇避不了
立法會接連有議員「中招」！秘書處尋日接獲一宗確診個案，就係議員陳勇染疫，現已居家隔離。話時話，由今年1月爆發第5波疫情至今，累計有33宗議員確診個案，其中林素蔚曾兩次確診，即已有超過三分之一嘅議員「中招」。
秘書處話陳勇前日曾出席立法會大會，亦曾喺6樓嘅議員辦公室逗留，但工作期間一直佩戴口罩，當日嘅快測結果並無染疫。佢嘅辦事處職員尋日都做咗快測，結果全部無感染病毒。
另外，醫院管理局尋日公布，話白普理寧養中心、沙田慈氏護養院及沙田醫院行政總監蘇詠儀確診，並已進行隔離。佢前日係最近一次上班，工作時有佩戴口罩同遵守有關感染控制措施，每日亦有進行快測，最近冇外遊紀錄。
家人確診 盧寵茂居家檢疫
由於同住家人確診，醫務衞生局局長盧寵茂亦進行家居檢疫，檢疫期間會在家工作。該局發言人話盧寵茂有定期採樣進行核酸檢測，尋日嘅結果並無染疫。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
