政情：未供鹹水 與鄉郊為敵 當局走數：鋪管欠效益

雖然，甯漢豪話政府正就東涌新市鎮及興建中嘅東涌新市鎮擴展區興建鹹水沖廁系統，預計最早於2023年底啟用，但佢承認除偏遠地區，欠缺鹹水網絡覆蓋嘅地區仲包括粉嶺、上水、港島山頂及南區地域。至於獲鹹水沖廁目前有61條新界鄉村，526條就用淡水沖廁。甯漢豪強調首30立方米食水係免費，即使個別用戶採用食水沖廁，每4個月大約需繳交100蚊啫。劉業強對回應表示失望，指鄉民都係納稅人，無理由要接受政府嘅差別待遇，又重提當局涉嫌行政失當，錯誤向山下圍村村民徵收排污費，要求當局派員了解每家每戶排污系統，畀村民一個交代。

講起排污，議員陳月明就話打鼓嶺某村落目前有一半地方欠缺排污系統，鄉民需要自行興建。佢憶起90年代興建新界東北堆填區時，政府曾承諾興建公共排污系統，但依家情況明顯係「走數」，詢問政府會否為鄉郊地區公共排污設立KPI（績效指標），講明幾時完成呢項基本民生設施？甯漢豪就話將與環境生態局及渠務署跟進。