政情：扭曲樓市政府死攬過時辣招助復甦應有序撤銷

過去政府為壓抑熾熱樓市而施行嘅「辣招」，已未必切合今日嘅時勢，但當局指綜合考慮樓價供求、市場氣氛等因素後，認為目前環境不需調整「辣招」。經民聯尋日發表關於「撤辣」嘅研究報告，指經濟環境惡化、樓市大吹淡風，政府仍然堅持「辣招」只會影響經濟復甦，甚至會窒礙外來人才來港意欲，因此建議政府要盡快出手、穩步有序咁「撤辣」。

經民聯成員、地產及建造界議員龍漢標指出辣招嘅「初心」，本來係非常時期之下緩解樓價嘅非常措施，況且當時有好多熱錢湧入香港，樓盤供不應求，不過今日環境係完全顛倒，「錢係流出香港」，因此主張政府需有序撤辣。至於研究報告就顯示辣招扭曲樓市，影響二手市場交投之餘又加劇上車盤升幅，但其實漫長嘅新冠疫情已導致香港經濟陷入收縮，住宅成交數字近年呈大幅下降嘅趨勢。就政府喺《施政報告》中宣布，符合資格嘅外來人才居港滿7年後，置業印花稅可「先繳後退」，但做法只係予人感覺「處罰」、刁難同排擠外來人才。

倡房屋政策雙軌制分割市場

針對撤辣建議，經民聯主張按部就班，第一步係立即取消買家印花稅，免除符合資格嘅外來人才繳付買家印花稅及新住宅從價印花稅、取消「先徵後退」安排，以及取消額外印花稅、優化新住宅從價印花稅，換樓人士可以喺兩年內「先免後補」。

「撤辣」第二步，需取消新住宅從價印花稅，達致全面「撤辣」。跟住「撤辣」嘅後續措施，實行房屋政策「雙軌制」，即政府提供充裕資助房屋，以及私人置業市場；前者係供無法負擔私人物業者有安居之所，後者則予有能力人士喺私人市場置業，以買樓嘅方式向政府繳納較多嘅稅項。

另一位經民聯成員、議員陸瀚民認為「雙軌制」係解決香港房屋問題之道，相信既唔會影響市民置業意欲，又唔會令冇能力負擔私樓嘅市民「無瓦遮頭」，唔擔心「撤辣」會影響到樓價咁話。