政情：6旬婦公眾席叫囂被控 律政司求立會交人作供

被告鄭敏娜，涉嫌違反《立法會（權力及特權）條例》下嘅藐視罪同干預立法會人員。案情指佢喺今年5月4日於立法會綜合大樓會議廳2樓嘅公眾席作出擾亂行為，令到立法會嘅會議程序中斷或相當可能中斷，又抗拒兩位立法會人員。事後鄭指自己只係想表達訴求，冇意圖藐視會議，亦冇襲擊立法會人員。但律政司有意援引證據去證明被告鄭敏娜當時大聲叫囂，並向會議廳拋擲自己張身份證，而當日會議需暫停約5分鐘。

根據《立法會（權力及特權）條例》（第382章）第7條，如未經立法會特別許可，任何議員或者立法會人員，唔可以就會議紀要或證據紀錄等嘅內容同文件，喺其他地方作證。所以律政司尋日就呢宗案件向立法會提交請求，希望7個立法會保安、人員同受僱於立法會嘅人士可以喺案中作證。而據《議事規則》第90（2）條，主席梁君彥已經按指示，將請求列入今日嘅立法會大會議程及審議。而有關案件已排期喺出年2月3日至7日期間進行聆訊。