政情：康文署想開位 畀蘇長榮照肺

立法會民政及文化體育事務委員會尋日開會討論康樂及文化事務署開設一個助理市政署長常額職位，呢個職位每年連埋福利都要使約三百一十萬元，職務包括制訂落實「十年文化藝術設施發展藍圖」、配合政府打造香港作為藝術科技重鎮嘅發展策略。文化體育及旅遊局副局長劉震仲話康文署自2000年之後，署長級職位嘅人數冇變過，而康文署有大概一萬人，只有12位署長級職位，所以就想開一個常設位。

議員蘇長榮話康文署好似「未瞓醒」，因為呢啲嘢之前康文署都做緊，劉震就話以後呢啲範疇嘅工作量都會大增，跟住佢就每個範疇都解釋吓要做咩，蘇長榮就打斷佢話「唔好當我幼稚園」、「唔好答得咁寬泛」，之後劉震就回應新嘅助理署長仲要同其他助理署長協調，而新嘅助理署長要加強領導角色。