政情：關愛隊要自己撲水 議員質問錢從何來

立法會民政及文化體育事務委員會討論關愛隊嘅建議，就住政府資助金額，議員馬逢國就講漏口，直接話「咁少錢」，但佢都立即改字眼，改用資源「有限」，就問政府有冇機制鼓勵團隊自主募集資源。民政及青年事務局局長麥美娟回應話明白到資源比較緊張，所以會睇關愛隊嘅服務計劃建議書，考慮佢哋尋求社會資源嘅能力，最終希望能夠凝聚社會力量，做到共同富裕，又話唔能夠單靠政府畀晒所有資源，而資助嘅實際金額唔單止睇當區人口數目，仲要睇服務計劃、人口架構等。

議員林琳關注點樣去衡量籌錢能力，問係咪要表明邊個社會賢達會贊助自己嘅團隊，麥話會睇佢哋嘅服務計劃書，從中睇隊伍要額外尋求幾多資源。

議員陸瀚民就叫麥美娟直接講政府資助嘅80萬到120萬元係包啲咩，例如會唔會包車馬費、物資費，或者可唔可以直接攞去派，又問政府要睇籌錢能力嘅話，係咪會優先考慮具規模嘅團體，麥就惟有話關愛隊唔係日日攞住福袋去派嘅，話如果買嘢派政府都得啦，唔使要關愛隊，又話唔係一定要具規模嘅組織，如果有新嘅機構有好好嘅諗法都會考慮。

關愛隊講到明要愛國愛港先做得，有議員問會唔會要求關愛隊隊長、副隊長宣誓，馬逢國都問如何識別係咪愛國愛港，麥就話會有具體要求嘅，不過內部仲討論緊，要等之後再公布準則。

身兼打鼓嶺區鄉事委員會主席嘅議員陳月明話沙打區（沙頭角、打鼓嶺）人口分布疏散，而打鼓嶺同沙頭角嘅範圍涉及幾千公頃，仲有唔同外島，若參考區議會分區招募關愛小隊，成效或會欠佳，問政府會唔會加強支援，甚至再分拆小隊。麥美娟就話會留意申請團體嘅計劃書可唔可以顧及唔同村落同市民嘅需要。