政情：鯉魚門排屋硬食風浪 謝偉銓要求政府補鑊

其實鯉魚門嘅居民可謂「見慣風浪」，近年受到極端天氣影響，令打風同潮漲時嘅水浸問題愈嚟愈犀利，早前嘅超強颱風「天鴿」同「山竹」襲港，更吹爛咗部分民居同設施，為此，政府其實都有喺部分對出海面興建防波堤、為村民加裝水閘、改建碼頭等措施，但偏偏有一段風浪拍打得最「應」嘅臨海排屋被「忽略」咗喎，甚至因為兩邊海旁都加建咗海堤同碼頭，令風浪同潮水集中湧向該幾幢排屋，情況反而仲差過以前，尋日Tony就係因為呢件事，去視察下鯉魚門應對風浪嘅措施囉！

咁政府為乜唔幫嗰幾幢排屋嘅居民整防波堤呢？政府就話因為工程技術同擔心影響航道，但係未有進一步嘅解釋，而土木工程拓展署10月尾有解釋關於整唔到防止水浸設施嘅原因，但Tony話居民唔單止要防水浸，仲要防風浪，所以佢就話要繼續同政府跟進，反映村民訴求，搵出有效同可行嘅解決問題方法。