政情：簡約公屋貴夾唔飽 當局死撐 不宜同公屋比較

陳學鋒日前喺政黨嘅社交平台拍片，話公屋申請者嘅平均輪候時間雖輕微縮短，最新數字係5.6年，但較3年上樓嘅目標仍大有距離。喺公屋供應「頭輕尾重」嘅情況下，未來4年平均新落成嘅傳統公屋單位，供應不足1.2萬個；「簡約公屋」同「過渡性房屋」，無疑係改善公屋輪候登記冊上，居民嘅「特效止痛劑」。而政府日前就公布簡約公屋4個選址，分別位於元朗、上水、以及屯門兩處地點；地盤面積由0.8至8.9公頃不等。

簡約公屋嘅選址是否方便出入，固然值得關注，但陳學鋒話造價方面，就更加惹人注目。佢話當局預計明年首季向立法會申請撥款，估計設計同建築工程費用約267.9億元，加上相關基建工程費用約6億元，用於營運及聘用額外人手推展項目嘅開支，分別為44億元及3億元，合共超過300億元嘅費用確實非常昂貴，促請政府必須資料公開透明，公帑用得其所，公眾先至會支持「簡約公屋」計劃。

對於簡約公屋選址偏遠及成本高昂，被揶揄「貴夾唔飽」，何永賢透過電台節目解釋，話簡約公屋造價唔可以同公屋比較，而應該以同類型項目比較，如過渡性房屋項目。由於每個簡約公屋嘅層數都不同，而較高樓層嘅簡約公屋須建造更多設施，樓宇結構亦要加固，建造成本自然較高，形為要「矮同矮嘅比」及「高同高嘅比」，強調所有估算都要基於科學數據而定。

何永賢重申「快」係興建簡約公屋嘅要素，指傳統公屋建造時間長達4至5年，相當於兒童成長嘅關鍵時期，要填補目前輪候嘅年期，唔希望佢哋嘅童年喺劏房中度過。為達到提速提效，會有7至8個項目同時進行，設計同工程將採取外判形式，冀向立法會申請一筆過撥款，話分拆項目撥款嘅空間不大。究竟何永賢嘅解釋，議員是否收貨呢？睇下政府就簡約公屋申請撥款會遇到幾多議員反對就知嘞。