政情：睹畢業生示威眼火爆張宇人叫踢出校

近年屢傳負面消息嘅香港中文大學，日前舉行畢業禮竟遭到手持標語嘅學生「贈興」，嘲諷該校係「沙紙交易所」。身兼中大校董嘅議員張宇人就喺報章撰文，狠批學生喺畢業禮示威嘅行為「自私自利」、「目無尊長」，敦促校方不應姑息，要將相關學生踢出校門！然而佢提出開除示威學生嘅主張，好快就遭到質疑，認為難以執行，究竟係點解呢？

就畢業禮上示威學生嘅口號，如「合資格社畜」、「未畢業就乞食」等，張宇人形容係「低檔次」同「搔癢式訴求」，批評一小撮人嘅行動，摧毁絕大多數畢業生嘅畢業禮，行為既不尊重學校、校長、教師、亦對唔住家長同自己；而佢本人都睇到「眼火爆」，話如果教出啲咁嘅大學生，試問香港人還有未來嗎？張宇人炮轟今次鬧劇極度荒唐，不滿校方袖手旁觀，似是故意縱容，主張校方應褫奪相關學生嘅畢業資格，踢出校門。

劉勇威笑「有冇常識」

張宇人嘅文章喺網絡流傳，大埔區議員劉勇威睇完之後就喺社交平台貼文，指「畢咗業先行畢業禮，踢乜嘢出校？」鬧張宇人「有冇常識」？劉嘅貼文惹來唔少網民留言回應，仲有人話「因住佢叫你出去隻揪」添。