政情：梁振英外訪返港確診新冠

「中招」嘅仲有議員林素蔚，佢尋日喺社交網站度公布確診，仲係喺3個月內第二次中招添！佢已居家隔離，又形容自已「很不幸」，話期望早日康復，繼續為大家服務喎。佢前日都有出席立法會大會，亦都返咗喺中信大廈嘅辦公室，但佢強調工作全程都有戴住口罩，依家嘅病徵都只係有啲咳同胸口痛。

至於坐佢隔離嘅議員張欣宇就話唔擔心咁樣會染疫，因為依家都咁多人染疫，而且嗰日開會同林素蔚都冇除口罩喎。加上自己小朋友都試過染疫，嗰陣自己都有病徵，但就係驗唔到出嚟，佢笑言「自己可能都有抗體」喎。

另外，民政及青年事務局局長麥美娟因其朋友確診，經衞生署衞生防護中心評估後被列為密切接觸者，已進行家居檢疫，檢疫期間會在家工作，而副局長梁宏正日前亦因家人確診，正家居檢疫；商務及經濟發展局局長丘應樺一名同住家人確診，佢亦已家居檢疫。兩人都有定期做核酸檢測，而尋日做咗快測，結果係無染疫。