政情：法律去殖化拖拉議員不吐不快

身兼法改會主席嘅律政司司長林定國指出，目前香港成文法系統性檢討嘅工作略有成績，共檢視76條法例或附屬法例，當中有7條法例或附屬法例已經完成適應化修改，另有兩條法例立法程序已經展開，或預計可於本年內完成，有部分法例就要喺實施《基本法》第23條嘅工作中作出適應化修改，會採取「先易後難」嘅方式去推動修改。

但議員陳曼琪就有啲唔滿意，佢提到，香港回歸25年，當然要捍衞香港憲法權威同特區憲制秩序，而且好多相關法律未能正確反映效忠對象，好似《刑事罪行條例》第200章第5條係「襲擊女王罪」，就相當唔適合。林定國指，有啲條例牽涉到23條立法，一環扣一環所以就會搞得比較耐，不過陳曼琪就唔太滿意呢個回應，話呢個答案同以前政府冇乜分別，覺得政府雖然要周全去諗，但都要「有為」，要「斬釘截鐵」去做決定。

議員林新強亦都關注字眼問題。林提到，自己作為法律工作者，條文出現殖民化字眼喺實際操作上冇咩大影響，但啲字眼真係「好肉酸」。佢又舉例《高等法院條例》第4章第6A條特委法官，影射近期黎智英請Tim Owen做代表，話近期有委聘非香港註冊律師做代表嘅案件，凸顯呢啲有關條例要盡快修改。議員梁美芬都話字眼嘅修改事不宜遲，如果唔咁做，普通人「望多幾次全部入晒腦」。

另外，議員周浩鼎就建議法改會要有時間表，定期公開進度畀大家知咩情況。林定國回應指，法改會係協調角色，政策性嘅改變都係要取決於決策局，至於法改會秘書長黃惠沖就回應話一定「走唔甩」嘅。

對此，議員江玉歡提到，如果主動權喺政策局，律政司係咪都要比較主動呢？林定國表示，法改會過去兩個月都有優化工作方式，請各位政策局官員坐低一齊傾嘅。無論如何，承諾會積極處理適應化，同大家交代成果。能否做到就要拭目以待啦。