政情：智能手錶未必可靠 李家仁：數據僅供參考

話說某日有一位十幾歲嘅小朋友喺母親陪同下向佢求醫，話脈搏經常徘徊喺每分鐘130以上，擔心身體出咗問題。

李家仁於是為佢進行詳細檢查，連心電圖都做埋，結果顯示一切正常，到底係邊度出問題呢？原來係小朋友腕上嘅智能手錶，監測脈搏功能失準，換言之，只係虛驚一場。李家仁又話，智能手錶往往受到條件所限制，錄得嘅身體數據只宜參考，譬如智能手錶測量血壓，就唔及得以手臂量度嘅血壓計咁精準。

講起手錶，原來李家仁近日就搵番一隻61年前嘅機械手錶，但礙於塵封已久，無法上鏈啟動，但幸好有一位老友退休之後充當業餘錶匠，為佢呢隻古董手錶「妙手回春」，仲換番條原廠鋼錶帶添。