政情：蕭偉強搵食獲加足料 老婆不解竟唱反調

蕭偉強喺社交平台貼文，話第一次帶夫人同教友去幫襯海防道熟食中心某大牌檔。大牌檔老闆見佢咁捧場，一於加大分量，除咗蕭偉強嘅跟餐豬扒麵，豬扒打孖上畀夠兩塊之外；就連佢太太所點嘅豬扒包亦採用大大件豬扒，足足大過個包兩倍！蕭偉強驚訝大牌檔老闆不計成本嘅做法，又聽到老闆娘一邊遞豬扒一邊哦「做乜咁疏爽呀？」

正當蕭偉強大讚老闆識做，今次真係畀足面，等佢可以喺太太面前威威之時，殊不知佢太太望住豬扒包，竟然問「點解個包咁細，冚唔晒件豬扒嘅？」至於點樣同太太解釋，蕭偉強就無交代啦。