政情：網民標準：30歲上車 招國偉自嘲失敗者

招國偉日前拍片引述該網民嘅意見，話唔明白點解去到30歲都未能擁有自己嘅物業，認為家境較好者，可以問屋企人贊助首期；無咁好嘅，可以搵女友或老婆一齊供，只要各自搵一份月入2至3萬元嘅工作，夾埋都有5萬，都足夠買個舊少少嘅單位。又話只要慳啲使，再加適當嘅投資，由20歲儲到30歲，無可能無錢嘅。該網民同時批評買唔到樓嘅「失敗者」於社交平台「圍爐取暖」；又補充話買樓只係「基本」，而非成功嘅標準。若果連「基本」都做唔到，咁就一定係失敗啦。

自稱過去係「屋邨仔」嘅招國偉話，自己同好多港人一樣喺公屋長大，仲要去到40歲左右先至有機會置業，而買嘅並唔係私樓，而係買居屋單位，如果按該網民嘅「基本」定義為標準，自己都係一個失敗者。招國偉話近期本港私樓價格下跌，但依然好貴，籌集首期談何容易呢？若有屋企人幫手咁就梗係好啦，但無「父幹」之下要慢慢儲錢，即使同配偶合力都唔容易，無論點追都係同樓價有一段距離。

更何況，單身或已婚人士都有其日常開支，同埋要畀父母家用啊。招國偉話如果「四大長老」都係退休人士，家用負擔更重。可以由20幾歲儲錢儲到30幾歲當然係好事，但招國偉強調每個人嘅價值取向都唔同，未必人人都願意「上車」之後畀層樓綁住自己，反而會將金錢用於進修或創業。

應該幾時買樓、又或者有冇需要置業，招國偉話見仁見智，總之按自己負擔能力啦，無話一定要買樓先至算「成功」，最主要都係想有個安樂窩啫，就算公屋都係一個安居之所，所以佢唔係咁同意，話30歲人仲住公屋或仲租緊樓，係失敗者嘅講法。