政情：陸啟康自比球證 要慎言避表態

過去選舉投票率大跌，陸稱自己身份有如「球證」，應慎言避免表態，唔會透露喜歡「歐洲波」定係「南美波」，但相信「多啲人睇波，球證一定吹得開心啲。」至於點樣提升選民登記人數，陸稱屬個人意向，唔可以強迫他人登記，只能多加宣傳。

對於有聲音話目前選舉法例及指引較複雜，佢指可能有人會犯下無心之失，選管會會考慮作出優化並探討可改善嘅空間。佢亦坦言工作人員通宵達旦點票好「陰功」，除咗使用電子儀器加快點票過程外，亦會研究縮短投票時間，但強調選管會非「一言堂」，會做好公眾諮詢及參考更多數據，平衡選民投票權利，唔會「離地」。

另外，被問及境外投票等可行性時，陸指有意見關注自主性及保密性，暫時無具體計劃，現時並非有急切需要。陸又透露，現時工作同法庭好唔同，笑言自己過往喺法庭上用慣英語，出任選管會主席後需要啲時間熟習中文用語，亦都試過擺烏龍，喺會議上將投票站講成投注站等。