政情：住宅圖則審批慢 專組處理慳時間

謝偉銓喺社交平台透露，指好多建築師呈送圖則予屋宇署審批，過程係等來等去，改來改去，一時話A部分唔符合法規，改完A部分隔一段時間，就會話B部分唔掂，當好快咁改咗B部分，又會話C部分資料唔夠，總之來來回回不知要幾多次，要花幾多時間，份圖則先至獲批，咁做法就梗係慢啦！

之不過，近日屋宇署話會成立專責審批組，處理500個單位或以上嘅大型私人住宅項目，同過渡性房屋嘅建築圖則申請，只要不涉主要土地規劃，或者消防安全問題，八成申請可以喺第一次，或第二次提交就獲批，時間肯定較依家快好多。謝偉銓又提到，好多私人機構已採用「建築信息模擬技術」製作建築圖則，不過政府部門仍然未全面開通。為咗畀業界查核有關圖則是否符合審批要求，當局計劃喺明年訂立路線圖，2024年初推出應用軟件，謝話佢同業界都期望政府可以爽手啲喎。