政情：檢查電力資格欠定義 職安健審議節外生枝

話說有關條例係要求，貨倉或貨櫃等搬運工作嘅場所，其輕型電力設備需由合資格人士定期檢查。至於乜嘢人先至「合資格」呢？政府代表就話，並無具體要求合資格人士必須係持牌電工，只要東主以書面指定邊啲人士可以從事檢測，而指定人士曾受訓練、具經驗同能力者，就可執行檢測工作。

議員李鎮強就話「是否小學三年班畢業都合資格？」質疑「訓練」同「經驗」到底有無客觀準則。委員會主席陸頌雄就指標準比較彈性，佢話「我以前喺學校都學過吓，咁係咪叫識呢？我喺屋企都有整吓電器㗎，咁又係咪叫識呢？」李鎮強就話「咁即係你同我都得喎。」

勞福局副局長何啟明話持有相關牌照，固然係資格嘅認可，不過亦有一啲「紅褲子」出身嘅師傅，即使欠缺牌照，但其日常工作仍會遵循法例嘅監管，所以亦容許佢哋從事相關工作。李鎮強就唔收貨，指今次修例嘅「初心」係減少意外。之所以要由持牌電工去負責電力裝置，目的係防止觸電同漏電等意外風險，若果由一啲受過「訓練」嘅經驗人士去檢查設備的話，點樣證明佢哋嘅能力合乎要求？而檢查設備之後又可否以簽署作保證呢？議員陸瀚民就覺得政府不斷移動定義，質疑被視為「合資格」嘅人士，到底知唔知自己具有資格？若果前線工友搵咗一個唔合資格但自以為「合資格」嘅人士，有機會出事㗎！

對於議員嘅質問，何啟明話不同工種係有唔同嘅「合資格」人士，難以劃一，如果全部都要列明，則需進一步修訂，更需要諮詢相關行業委員會，要走好多程序。陸頌雄認同何嘅見解，話「全身都係牌照先可以返工？」又指有關法案委員會已召開多次會議，仍未完成逐條審議階段，儘管尋日嘅審議進度較為順暢，預料需再開6至10小時會議，期望聖誕前完成逐條審議，但又補充話「唔一定得」，如保守估計則「農曆新年前啦！」