政情：菲林掃描器入冷宮李偉峰開箱變「古董」

科技推陳出新，昔日當時得令嘅數碼產品，不知不覺就變「古董」。油尖旺區議員李偉峰，近日搵番一部塵封多年嘅菲林掃描器，開箱之後發覺欠缺電源線，大費周章尋找電線之後，又發覺掃描負片不能轉回正像，應否買過部新掃描器，令佢十分糾結咁話。

買咗近10年未用過

李偉峰尋日喺社交平台發表「開箱文」，話「部機買咗近10年都未用過。原來scan（掃描）黑白可以，負片唔識轉，同埋每個file（圖檔）得800-1200kb」，照咁睇，呢部菲林掃描器嘅功能的確落後於時代。話說10年前嘅李偉峰係議員助理，日常工作不時都會使用相機，於是就網購一部菲林掃描器，打算以數碼方式儲存菲林影像，但後來工作繁忙「冇咗件事」，新購嘅菲林掃描器就此入咗「冷宮」。

早前，李偉峰見到一則有關數碼影像嘅廣告，先至醒起自己擁有一部尚未開箱嘅菲林掃描器。不過功能已經落伍，睇嚟物色另一部器材，應該都冇咩懸念啦。