政情：左梁右李議辦開張 唱歌氣氛高漲

梁熙同李鎮強雖屬於不同政黨，但前者嘅議席係來自港島東直選，後者曾擔任兩屆東區區議員，兩人喺當區都算得係「地膽」。不過論年紀，李鎮強稍大過梁熙，李話希望發揮「以老帶新」嘅作用，與對方一齊「拍住上」，為街坊來更貼地同貼心嘅服務。梁熙就話佢同李鎮強都係鍾意唱歌嘅議會新丁，於是兩人嘅「孖頭」議辦開幕就採取嶄新形式，一於同大家即席夾歌，「唱好香港」咁話。

早前同梁熙喺小西灣開設「孖頭」議辦嘅管浩鳴，亦到場同梁、李兩人一齊大開金口。擔任主禮嘉賓嘅政務司副司長卓永興，梁熙曾問佢會否高歌一曲，但佢話有自知之明，都係咪搞啦。卓又話幸好場地有上蓋，否則真係擔心有人送兩個啤酒樽畀佢喎，又指今次議辦開幕禮別出心裁，可以令大家唔使咁拘謹，大讚梁、李兩人夠貼地，了解年輕人大概鍾意啲咩嘢形式，相信兩人關注青年事務，喺呢方面嘅處理會得心應手。

話雖如此，議員喺音樂會上獻唱嘅「明天會更好」、「光輝歲月」以及「強」，對年輕人而言實屬叔父輩嘅陳年舊歌。