政情：知情不報罰則輕虐兒恐變傳染病

最高囚3個月議員鬧爆荒謬解說

社會上有關懷疑虐待兒童個案不斷上升，早前更爆出「童樂居」大規模虐兒案。政府建議於虐待兒童強制舉報規定上，除醫生、牙醫及護士等醫護人員外，亦建議增加其他在表列註冊的醫療人員，如物理治療師、職業治療師或視光師等。但有關知情不報罰則太輕讓不少議員感到不滿。其中議員容海恩及陳家珮拍片提到，罰則過輕令人感覺有關規定並唔係保障兒童，反而係保護一班專業人士喎，點解咁講呢？

陳家珮形容，過去發生大規模虐兒事件，搞到虐兒好似病毒一樣會傳染，你打完無事之後我又打兩下咁，實在令人髮指。但係另一方面，亦有唔少家庭虐兒個案，而現時政府建議其他表列註冊醫療人員，包括物理治療師、職業治療師及語言治療師等一系列專業人士，納入強制舉報者名單內，原因係因為佢哋係家長以外，最有機會接觸受到被虐兒童嘅人士，立法強制舉報絕對係好事。

初犯難判監或罰款了事

不過，外界普遍認為應加重罰則。容海恩提到，現時政府建議將強制舉報懷疑虐兒嘅罰則定為監禁3個月及罰款5萬元，容認為，若初犯定唔會判監，或最終都係判社會服務令或罰款了事。佢亦不滿勞工及福利局局長孫玉菡早前解釋指，由於其他罪行知情不報都只係判監3個月，於是用此標準訂立監禁時間，容認為說法不可接受。

另外，當局亦曾表示強制舉報者全部都係專業人士，認為監禁一日對佢哋嘅懲罰都好大，短期監禁已有足夠阻嚇性。對此容大呼「有冇搞錯」，依家係保護兒童唔係保護專業人士，天子犯法都係與庶民同罪，為何專業人士就可以犯法？事實上知情不報形同施虐者，容許兒童繼續被人虐打係不可接受。陳家珮同樣認為不合理，因為訂立法例嘅原意同初心，係保護小朋友，而唔係保護強制舉報者！