政情：旅業救亡楊潤雄答非所問議員火滾

通關取態保守支援又唔夠

雖然疫情終有完結嘅一日，但遭受重創嘅行業仍未知幾時走出隧道盡頭，旅遊界議員姚柏良尋日喺立法會提出質詢，指業界急需知道政府調整各項防疫措施嘅走向同時間表、以及冀設立旅遊業復業基金，以助業界重新啟動業務。文化體育及旅遊局局長楊潤雄話明白旅遊業所面對嘅困難，政府已盡量向業界提供空間，可以幫到旅遊社做接待的話都會盡量去做。多位議員都認為楊答非所問，質疑支援並不足夠，直言旅遊業並非「吊鹽水」，而係「吊頸」。

姚柏良指政府雖放寬多項入境檢疫同防疫措施，但仍對入境旅客十分不便，因而業務空間十分有限。姚話2022年頭9個月訪港旅客只有約25萬人次，較2018年同期嘅約4,700萬人次，大跌99.5%。對於楊潤雄一再指出38.8億元承擔額嘅支援，同埋旅遊業受惠於兩輪保就業計劃，姚話38億元「聽落好似好多」，其實佔3,000多億元防疫抗疫基金不足兩個百分點，話如果計埋2019年下半年，旅遊業苦撐咗4年啦，依家正面臨部署逐步恢復業務嘅時刻，需要政府適切嘅支援。

淪超特困行業正在吊頸

議員李鎮強指旅遊業喺過去3年淪為「超特困行業」，幾乎係「零生意」，又形容業界正「吊鹽水」，依家喺深切治療部，有必要提供「吊命錢」嘅適切補助。議員狄志遠就接住話，業界「唔係吊鹽水，而係吊頸」，直斥「局長講十幾分鐘都幫唔到旅遊業」，質問乜嘢情況可施行0+0。醫務衞生局副局長李夏茵就話「數字唔係好大意思」，又指國際疫情同變種病毒係兩種不能控制嘅風險，而隨住入境人數愈來愈多，近日疫情數字上升，因此不能掉以輕心。

李夏茵嘅回應，遭議員謝偉俊批評「聽落好穩當，好保守，好為市民健康着想」，但其實係「過分怕事」，話繼續呢個抗疫方向，唔單止害死整個旅遊界、整個香港經濟。議員黎棟國亦直言局方答非所問，促回答會否利用本港酒店作前置檢疫、推出旅遊界復業基金。楊潤雄指前置檢疫正在磋商，冇辦法答到問題；基金冇詳細內容，如有具體內容就會考慮。