政情：黃偉鴻放生小蜥蜴 尊重動物本色

之不過，黃偉鴻話小蜥蜴看似柔軟，其實身上嘅鱗片好堅硬，而又正因為鱗片喺太陽之下閃閃發亮，咁先至畀佢喺山間小徑發現呢條小蜥蜴咋。然而奇怪嘅係，小蜥蜴唔似一般四腳蛇見人即遁，反而老神在在停留路邊，黃偉鴻好奇之下俯身細察，但又擔心小蜥蜴有毒、會咬人，於是搵條小樹枝試探一下，發現小蜥蜴竟然怕唧，扭擰嘅反應逗得黃偉鴻大樂，從而放下戒心伸手上前，小蜥蜴即一躍而攀，今次都可謂天降寵物啦。

黃偉鴻再近距離仔細端詳，見小蜥蜴頭部同一隻腳受傷，於是就拎番屋企，餵飼菜葉同清水。黃偉鴻話小蜥蜴友善、願意同人產生互動，已具備作為寵物嘅條件，但曾經飼養狗隻嘅黃偉鴻，深感寵物壽命較人類為短，無謂將來再歷送終之痛；況且飼養環境再好，頂多係一間屋四面牆，遠不如天地無邊嘅大自然，所以黃偉鴻將休養過後嘅小蜥蜴回歸郊野，畢竟動物嘅天性，係自由。