政情：教會分享 謝偉銓講官僚異象

話說Tony一向都批評政府將土地「曬太陽」，又經常拖延好多設施嘅興建。約兩年前某教會牧師閱讀Tony喺報章發表一篇批評政府官僚作風嘅文章，深有共鳴，於是就去立法會搵Tony申訴，佢哋申請興建安老院所遇到嘅種種困難。Tony了解個案後答應跟進，擾擾攘攘一年之後，教會起安老院嘅申請終於有眉目啦。

至於Tony出席嘅「異象分享會」，其實係有關建院工作嘅籌款晚宴。喺分享會上，Tony話當日了解個案情況後，覺得真係幾離譜，社署做嘢真係好慢、好官僚。Tony又指香港嘅人口老化問題日趨嚴重，安老院舍服務係必要同必須嘅，佢又呼籲大家積極支持教會嘅建堂及建院工作。