政情：怕手雕麻雀失傳 梁文廣助小店斡旋

話說屋宇署早前指佐敦某唐樓嘅地下樓梯底有僭建物，並向業主發出清拆令，而位於上址嘅手雕麻雀店，其去留就惹起各界關注。梁文廣指當局已採取酌情處理，將有關命令延期之餘，又容許該唐樓業主，只需將僭建部分修正至符合相關法例要求即可。儘管有專業人士答應義務提供工程圖則，業主亦口頭承諾清理僭建物之後，予手雕麻雀店原址經營，之不過，店東仍有顧慮，梁文廣話業主同店東如果能達成書面協議，對雙方都有保障咁話。

至於不擅打麻雀嘅梁文廣，點解會咁留意呢間樓梯小店呢？原來佢太太曾經委託該店手雕「梁文廣」三字嘅麻雀牌，送畀佢作為案頭擺設，因此就同店東結緣嘞。梁文廣話手雕麻雀係屬於香港特色嘅傳統文化，佢會繼續跟進事件。