昔日東方政情：新冠未完 年度漢字「疫」再入選
有政黨連續第9年舉辦「香港年度漢字評選」，尋日佢哋就公布咗呢10個候選漢字，分別係「團、民、青、守、創、慶、援、新、疫、通」，其中個「疫」字仲係2021年嘅年度漢字添！
呢10個字就係由立法會主席梁君彥、議員葉劉淑儀、劉國勳、中文系教授盧鳴東等人揀嘅，而且每個字仲有唔同含義添，劉國勳尋日都有出席公布儀式㗎。
「通」字上榜 反映通關渴望
劉國勳就話，「疫」字入選係因為持續3年嘅新冠肺炎疫情，而且世衞又宣布將猴痘列為國際公共衞生緊急事件。咁睇呢個字真係唔入選唔得。至於「通」字相信都係好多市民嘅心願，因為意味住暢通同通關！
而另外8個入選嘅年度漢字其實都有佢哋嘅意思。「團」就係團結社會；「民」就係政府要以民為本；「青」自然就係一路以來講嘅青年興則香港興啦；至於「守」就係守護；「創」就係創新，又意味住香港要成為創新科技中心；「慶」就係祝賀；「援」就係支援；「新」就係革新、去舊迎新咁話喎。隱藏嘅意思咁多，最終年度漢字係邊個，就要睇邊個獲得嘅投票多啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
