政情：嫌搶人才講法粗俗謝偉俊叫政府慎用

雖則話中港融合，但遣詞用字方面，港人仍然唔習慣內地嗰一套。立法會尋日辯論《施政報告》致謝動議期間，議員謝偉俊（Paul）批評「搶人才」字眼粗俗，同香港呢個儒雅嘅社會格格不入；佢又強調必須保留一國兩制嘅價值觀，否則樣樣嘢都跟風，香港就好似內地二、三線城市咁㗎喇。

對於有內地特色嘅文風，阿Paul並非全然抗拒，譬如談及財政儲備由一萬二千億元急降至八千億元，佢就話唔希望咁快見到「清零」嘞。但官方文件竟然用到「搶」字，難免令佢感慨香港過去一向都係崇優、崇專業、崇儒雅，點解一下子變得咁粗俗、咁地痞化呢？其實用「吸引」或「挽留」會唔會更加好呢？佢話明白政府用字通俗，目的係令人容易明白。然而一個優質嘅社會，領袖或管理層都應該重視如何表達。阿Paul話收到唔少朋友嘅意見，指新加坡總理李顯龍同商界人士討論輸入外勞，就懂得用歌曲去表達政府訊息，其高明手法令人印象深刻，話香港嘅領導都識得咁做就好啦。

籲認清流失原因勿「騰籠換鳥」

就中港關係日趨緊密，阿Paul話香港同內地合作固然重要，但採用字眼方面唔好太貼近內地，犧牲香港傳統文化背景；況且吓吓都話要打要搶，實非香港應該有嘅方向。講到「搶人才」，佢質疑政府喺現時嘅中港關係下，有無想過保留唔同嘅價值觀、容許講啲唔同嘅說話，繼續保持香港係一個包容開放、多元、尊重同崇優嘅社會？佢話客觀事實係香港流失14萬勞動人口，當中不但涉及各行各業，仲包括好多精壯嘅年輕人，同教育水平高嘅中產，而好多人嘅離開只因為價值觀不同，相信移民趨勢喺未來幾年只會更加嚴重，所以政府嘅人才政策就務必把握問題所在，唔好諗住「騰籠換鳥」，自己呃自己咁話。

阿Paul又以魚缸做比喻，話水換得太快嘅話，魚係會死、係會跳走㗎；而即使「由治及興」等良好意願充斥於耳，但實情係佢聽得最多嘅坊間討論係移民，或投資慘況；加上市面愈來愈多特賣場、兩餸飯店舖，咁嘅景象點睇都係一個困難同辛苦嘅時代。