政情：A4研究部出手探討三隧分流

由議員楊永杰、張欣宇、梁文廣、林素蔚4人所組成嘅合作平台「A4」，雖然唔係政黨，但就倣效其他政黨一樣設立研究部，冀透過政策研究提升議政質素；而近日投入運作嘅A4研究部，頭一炮就以政府下個月交上立法會討論嘅「三隧分流」方案做資料研究。

話說兩個月前A4研究部仍處於籌組階段，楊永杰就打算以「北部都會區發展及設計」為研究部嘅首份「功課」；但可能鑑於「三隧分流」更具迫切性，於是交通議題就成為研究部成立之後嘅第一個任務。楊永杰話研究部會透過問卷調查嘅方法，為「三隧分流」收集數據做研究，又話有數據在手，相信議事質素都會有所提升咁話，仲打算喺11月底或者12月頭開記者招待會交代一下研究成果添。

支出由4位議員攤分

至於員工薪水等嘅研究部支出，A4係點安排呢？楊永杰就話佢會同其餘3位成員攤分，除番開每人每個月約莫畀萬幾蚊啫。