政情：港教育制度太殘忍 分數至上點樣留人

立法會尋日就《施政報告》進行致謝議案，期間傾到「不斷增強發展動能」呢個議題嘅時候，多位議員除咗討論「搶人才」，亦關注如何培育同留住本地人才。劉智鵬指教育制度嘅優劣，係境外人才是否考慮來港、或本地人才是否繼續留喺本地嘅重要因素。而香港嘅現實，就係有辦法嘅家長若非送子女入讀國際學校，就係送往海外升學；至於其他學生就喺主流學校，擁抱「以分數為目標」嘅教育制度，不停咁操練同應試。而無論國際學校同本地學校幾咁大差異都好，兩者嘅學生都可以升讀國際級大學，而呢個現象或者可以說明，本港嘅學生其實不必喺「以分數為目標」嘅學習環境中成長。

因此，劉智鵬建議倣效國際學校嘅教學方法，鼓勵學生自主學習，培養個人成為有學識、有見識、有創意嘅人才。為咗未來嘅香港有充足嘅人才，政府應以具前瞻性、具啟發性嘅優質教育為基礎，攞出一套完整嘅人才政策。

議員梁子穎就呼籲政府做好「人心工作」，主張招攬人才嘅同時，亦需與本地教育作出配合，譬如推動職業大學發展，畀年輕人睇得到未來，令佢哋對政府有信心。議員周浩鼎就指香港有必要推動職專教育。不過佢覺得職專教育目前存在「被矮化」嘅情況，因為現時就讀應用學習科目嘅學生，喺文憑試最高只可以考獲4級，變相令到應用學習科目嘅學生有別於修讀傳統科目嘅學生。佢質疑咁嘅安排會令學生欠缺修讀職專教育嘅誘因，因此建議將應用學習科目最高可考獲成績同傳統科目睇齊，以鼓勵學生修讀、以及推動職專教育。