政情：張翔捐一半年薪 啟發培養港大生

開估！張翔話會捐出一半年薪，嚟支持一系列港大發展同包括師友計劃在內等擴闊學生視野嘅項目，希望藉此鼓勵更多社會人士同校友，支持港大啟發同培養未來領袖嘅重要活動。其實張翔捐薪有前科。話說喺2020年4月中旬，因應疫情對社會及經濟嘅影響，港大成立援助基金幫助社區及有需要嘅學生，張翔同5位副校長每月捐出10%薪酬，為期一年。

講番今次師友計劃啟動儀式，同時亦開啟首個港大元宇宙AlumniLand嘅新篇章。結合虛擬同現實嘅HKU AlumniLand由港大部門自行設計，使用3D立體模型、經過精密測量同繪製設計，用家可於數碼化嘅本部大樓內遊歷，參加藝術展覽、電影首映以至舉辦個人聚會等，宛如親臨其境，咁就可以令唔同年代嘅同學同校友，透過虛擬世界連結及互動。