政情：下流一族上車難貼地劇集見悽慘

鄧家彪叫何永賢「睇」察民情

基層人士申請公屋，唔知等到何年何月先「上樓」，要「上車」就更加困難。上周做完視網膜手術、左眼蓋住紗布嘅議員鄧家彪（Bill），喺休養期間仍「一眼睇晒」近日好Hit嘅電視劇《下流上車族》，尋日喺立法會一個小組委員會上，建議房屋局局長何永賢睇吓呢齣題材「貼地」嘅劇集，去了解吓夾心階層家庭嘅難處同辛酸。

話說何永賢喺立法會改革扶貧政策和策略小組委員會上交代興建簡約公屋嘅進展，期間發生一段小插曲。身兼小組委員會副主席嘅阿Bill喺發言時竟然唔記得開咪，要其他委員提醒先意識到，佢一開番咪就講唔好意思，可能覺得其他議員同事見佢變「獨眼龍」，誤會佢睇得唔清楚，佢仲特登講咗句「睇到嘅，放心」。

跟住阿Bill就話最近有套神劇，就算唔係講窮到要攞綜援嘅人，但都講出夾心階層嘅住屋困難，仲叫局長有時間可以去睇吓，幾好睇、幾好笑，當然有啲情節係誇張咗，但心態係咁樣。雖然佢冇講套神劇係乜嘢名，但何永賢完全接收到，回應時仲笑稱都有睇，都係反映香港情況，大家好關心嘅問題！

房屋怪現象壓抑生產力

其實阿Bill唔單止問何永賢有冇睇電視劇，仲提到基層市民為咗排隊上公屋但為免入息超標，於是就會報少啲收入，甚至唔報收入；到咗成功上樓，呢啲家庭好快面對仔大、女大，佢話一個家庭上咗樓，估計仔女啱啱讀初中，10年內唔係讀大學，就應該踏足職場謀生，到時4個家庭成員都做嘢嘅話，入息又再爆錶；結果一係就拆戶，一係唔好出嚟做嘢，以致壓抑生產力，衍生好多房屋怪現象，如出現空巢老人嘅問題，社會要付出資源去照顧呢啲老人家。

佢問政府有冇思路將租客社會調整成業主社會，而呢啲業主係政府有支持，樓價係可負擔嘅，唔係將畢生或兩代人嘅積蓄全部投放喺納米樓，而係800呎，3代人都住喺度呢？何永賢就話會平衡各方面嘅需求。

另一議員吳秋北就問當局會否考慮喺廣東省購買閒置房屋，邀請長者到內地居住安老，以騰出本地房屋，增加供應數量，加快市民上樓嘅速度。何永賢就話喺長者嘅適應能力同周邊配套好重要，有唔少年輕家庭搬去另一區都會覺得唔適應，長者就更不在話下，擔心佢哋唔能夠適應全新嘅居住環境。

阿Bill亦質問乜嘢係精準扶貧？幫邊啲群體？話政府要快啲講清楚，以及交代會否調整貧窮嘅定義，同埋扶貧委員會點樣重組？