政情：5日3議員中招 輪到林順潮

林順潮呢兩日有乜行蹤？立法會秘書處話佢最近喺本月11日，即上周五返回立法會綜合大樓會議室1同3出席會議，當日嘅快測結果為冇感染，工作期間一直有佩戴口罩，並無同其他議員或佢嘅職員有密切接觸，而佢嘅辦事處職員尋日亦都做咗快測，結果都係冇感染病毒。秘書處評估感染風險後，已安排消毒同感染個案有關嘅地點同公眾地方，又話自今年1月第5波疫情至今，同立法會有關嘅感染個案共468宗。

話時話，林琳喺上周四（10日）公布確診後，同佢早一日喺立法會宴會同枱食飯嘅7名議員都好高危，但至今都冇人中招，反而另一枱嘅陳沛良之前就話中咗招，至於林順潮當日係咪有同其他議員一齊食飯就唔知道喇，會唔會係有「飯局」群組爆發呢？而佢喺議事廳嘅座位，係最後一排最後一個位，同林琳相隔咗一排，係咪有段距離都感染到病毒？咁就不得而知嘞！