昔日東方政情：睇恐龍展拍拖 蕭偉強輸畀細路哥
香港科學館依家有個名為「尋龍記」嘅專題展覽，勞工及福利局前局長蕭偉強日前同太太拍拖入場，一睹展出嘅恐龍標本同珍貴嘅化石骨架，同時又參觀館內有關地球構造嘅常設展覽；史前生物之奇妙、大自然力量之浩瀚，兩者皆令佢感到震撼之餘，事後仲有另一個來自年齡嘅震撼喎，點解咁講呢？
拼英文名 轉頭唔記得
蕭偉強喺社交平台貼文，話佢同朋友傾偈，對方提起佢個5歲嘅孫只係睇相，就講得出每一種恐龍嘅中文名稱，蕭心諗唔算好難啫！殊不知小朋友竟然連恐龍嘅英文名稱都噏得出，咁就真係佩服得五體投地啦！後來蕭自己試吓，英文口窒窒成10秒至勉強拼得出一個，然後轉頭唔使10秒就忘記晒，於是慨嘆話5歲同65歲，係另一個震撼啊！
儘管上咗年紀，記憶力方面係難以同小朋友比較，但講番參觀恐龍展覽嘅體驗，蕭仍相當回味，仲大讚免費入場，香港嘅博物館真係唔錯咁話。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
