政情：柯創盛上載家鄉菜靚相 話估中有獎

柯仔話因為工作關係，已經有一段時間冇返媽媽屋企食飯。前晚同媽媽傾完電話後，媽媽就好開心，即刻問佢想食乜嘢？佢就回想起自己細個好鍾意食媽媽自製嘅發糕、茶粿同韭菜粿等家鄉美點，所以就話想食家鄉嘢，柯媽媽都二話不說整咗畀佢。佢都話媽媽年紀好大，但都會願意為兒子整嘢食，所以就覺得呢啲美食雖然唔係山珍海味，但永遠係最珍貴。

咁究竟柯媽媽整嘅係乜嘢呢？柯仔係貼文中就叫大家估，但回應東網記者查詢後，原來唔係佢提到嘅發糕、茶粿同韭菜粿，而係水瓜烙，做法就係將水瓜刨成絲，加麵粉同肉碎攪拌。柯仔話水瓜好清甜，咁樣整「味道好wonderful」咁話喎，雖然佢話自己都識整，但就一定唔夠媽媽整得好食啦！