政情：樹木辦主業做統籌 黎棟國話唔夠

話說黎棟國日前出席一個網台節目，期間提到香港嘅樹木管理。佢話樹木問題唔係最近呢一兩個月先發生，政府喺10年前都因應問題成立咗樹木管理辦處（樹木辦），但成立咗咁耐似乎睇唔到啲咩成績。佢認為咁係同政府冇有系統咁處理樹木有關，佢話依家有9個政府部門負責處理樹木不同嘅問題，但係就冇專責嘅職系處理樹木，而現時樹木辦係負責制訂有關嘅政策同埋統籌嘅工作，但係冇處理到執行嘅問題。

佢覺得樹木辦喺處理樹木問題上，唔單止要負責指揮，其實都應該要睇埋細節上嘅嘢，仲要同負責樹木嗰9個部門嘅人溝通，管理嗰9個部門嘅人。同時亦要運用現代科技將樹木問題分門別類，用監察系統睇咁樣先可以有系統咁處理問題。佢仲話分開9大部門各自修行嘅話，問題只會重複發生。