政情：港搞保育不濟 又係土地問題

日前林筱魯應議員江玉歡邀請出席對談節目。期間江玉歡提到一啲西方國家，彼邦隨隨便便一間咖啡店或朱古力店都有百幾二百年歷史；就算係售賣手信嘅店舖，閒閒地都可以7、80年。咁就不禁令佢想起香港好多街坊小店往往得十幾年，而隨住新界區如火如荼嘅發展，更多老店逐一消失，情況令人扼腕。點解外國嘅百年老店舉目皆是，而香港店舖嘅生存時間就咁短？而城巿要發展，又點樣兼顧保育呢？

講起保育，林筱魯指香港的確係落後於人，不過近廿年就有好大進步，尤其係一啲村落嘅保育，過往都係不斷推動，之但係，保育嘅土地資源點樣搵呢？外國之所以能夠存在百年老店，而香港就難以做到，當中一個重要原因，係外國嘅土地供應近乎無限，而地契通常都屬於永久性，物業重建價值有限。反觀香港，若果業權人擁有嘅巿區地契係999或99年期，同埋樓面面積無限制的話，就會存在物業拆卸重建嘅誘因。因此香港嘅巿區就係不斷咁拆卸重建，約以30年為一個循環；由維多利亞城開埠至今都差唔多拆過6轉！如果外圍有多啲土地供應，至少可以紓緩一啲壓力，而較諸世界級嘅城巿標準，香港自然郊野面積大到離晒譜。

至於部分受重建影響嘅老店，日後安置喺商場做法，江玉歡覺得風味遠遜舊時，林筱魯亦有同感，話「去新加坡睇吓牛車水，仲有無昔日嘅味道呢？變咗就係變咗㗎啦。」林筱魯又憶述過往嘅涼茶舖為應付競爭，售賣糕點同咖喱魷魚，雖可視為經營上嘅一大突破，但畢竟無關本業傳統，結果顧得個軀體，就無咗個靈魂咁話。