昔日東方政情：林琳中招恐惹同僚 全員收快測號召
疫情再殺入立法會！議員林琳尋日喺社交網站貼文，話朝早快測結果驗出有病毒，即時居家隔離，只有輕微病徵。由於佢前日喺議事廳就動議發言，中午又喺宴會廳與幾個議員同枱食飯，當時大家除晒口罩，邊食邊傾，真係有啲高危。據聞，立法會主席梁君彥仲建議各議員盡快做核酸檢測。
睇番林琳嘅足迹，前日出席立法會大會，曾逗留二樓會議室同5樓會客室，亦喺宴會廳食飯，周二傍晚踏足中信大廈嘅辦公室。由於宴會廳恢復供應自助餐，唔少議員都有幫襯，與林琳同枱食飯嘅7名議員，包括邱達根、陳健波、陳振英、劉國勳、陳勇、陳恒鑌同黃俊碩。食飯當然要除口罩喇，佢哋係咪都心驚驚呢？
同枱7議員都冇確診
立法會秘書處話同枱食飯嘅議員都做咗快測，結果全部冇染疫。坐喺林琳左邊嘅黨友、會計界議員黃俊碩話每日都有做快測，尋日朝早亦同辦公室嘅同事做咗核酸檢測，正等緊結果。至於坐喺林琳右邊嘅黨友陳恒鑌就話只係喺宴會廳逗留咗5分鐘，快測冇染疫，尋日朝早亦做咗核酸測試咁話。
爆疫近3年，期間有部分議員曾經中招，亦曾發生過有議員疑似喺議事廳感染病毒。講緊邊個？話說喺今年中，紡織及製衣界議員陳祖恒（Sunny）經快測證實確診，而前一日就係答問大會，當時身兼行會成員嘅議員劉業強坐喺Sunny左邊，事後快測結果冇染疫，但事隔幾日，劉就話核酸檢測結果中招，佢係首個行會成員確診。
前日大會嘅動議辯論，唔少議員都有發言，期間有3個議員以英文發言，林琳係其中之一，而佢當時亦有戴住口罩。佢右邊係「吉」位，冇人坐，左邊係黨友郭玲麗，前排最近佢嘅係蘇長榮同江玉歡，後排最近嘅係管浩鳴同吳傑莊，睇怕佢哋都要加倍注意身體狀況嘞！
楊何蓓茵嘅家傭染疫
此外，公務員事務局發言人尋日話局長楊何蓓茵因其同住家傭快測中招，已按衞生署衞生防護中心指引進行家居檢疫，檢疫期間會在家工作。楊何喺前晚做咗核酸測試，尋日亦做咗快測，測試結果都係冇染疫。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
